عن الدراسه في ايطاليا

بسم الله الرحمن الرحيم

الدراسه في ايطاليا :

باب القبول للدراسه في ايطاليا 2017_2018 راح يفتح في الايام القليله القادمه..

انا هشرح الخطوات واتمني الناس تستفيد.. وبنزل اشهر الجامعات الايطاليه. وكيف تجيب القبول وبعدين المنح..

الموضوع عاوز تعب وجهد.. والله الموفق

اولا: لدراسة الماجستير في ايطاليا..

تدخل موقع الجامعه الايطاليه وتفتش في الاقسام وتشوف البرنامج العاوز تدرسو بعناية. كل برنامج له متطلبات لازم تحققها.. التقديم بفتح قريب دائما اغلب الجامعات الايطاليه التقديم من شهر 2 الي شهر 6 كل عام.
دراسه الماجستير في ايطاليا مدتها سنتين في 90% من التخصصات. وفي بعضهم سنه واحده.

المطلوب شنو عشان احقق الهدف وهو المنحه الدراسيه مع القبول.

اولا:~  لازم اجيب القبول من الجامعه يعني شنو؟ يعني ترسل ورقك وشهاداتك للجامعه يعني تقدم طلب التحاق بالجامعه بناءا علي المتطلبات المطلوبه.. بعد تقدم الطلب هم بدرسلو الطلب ويشوفو هل انت مؤهل ام لا.  اذا مؤهل برسلو ليك خطاب قبول انو نحنا حجزنا ليك مقعد في الجامعه وكدا انت اكملت 50% من المشوار.

المتطلبات شنو بتاعت الجامعه عشان اخد قبول :
تختلف من تخصص الي اخر ولكن اغلبها بكون كدا :
* شهاده الجامعه بتاعتك
* شهاده التفاصيل
* السي في بتاعك.
* صوره من جواز السفر.
* شهادات توصيه من دكاتره في الجامعه او من الشغل بتاعك.. المهم اعمل خلطه من هنا ومن هناك افضل.
* شهادات خبره لوعندك اوكي لو ما عندك مامشكله المهم هي بتدعم الطلب اكتر. بتفيد لاحقا عند التقديم للمنحه.. لكن ما حنك بتتجاب برضو من غير خبره.
*الجامعات في ايطاليا ما بتطلب الايلتس منك، بس لو عندك ممتاز لو ماعندك تقوم تجيب شهاده من الجامعه انك كنت بتدرس بالانجليزي وكدا اتحلت المشكله.
* تكتب مقاله طويله عن نفسك (personal statement) حياتك كلها خطوات التعليم والمشاريع الشاركت فيها والكورسات الاخدتها والمعاناة المريت بيها ويكون فيها تحفيز انك تطمح للافضل دائما وتحفيز انو انا عاوز ادرس في جامعتكم دي وطموحي انو اكون كدا... الخ وامسك كدا... الخ . تكون خاليه من الاخطاء القرامر ومرتبه وياحبذا لو استاذ انجليزي راجعها ليك.  وتقدم الطلب.

ملحوظة:~

حاول اذا كنت بتفتش في موقع الجامعه ومالقيت الكورس العاوزها او في سؤال تقوم ترسل للقسم او الكليه بالايميل وتسال مهم جدا يكون عندك ايميل وتتواصل معاهم دائما بالايميل. عذبهم شديد وما تخليهم نهائي.. لو ما عندك صبر للموضوع انسي المقال دا كلو وريح راسك.
انواع القبول ياقبول مشروط او غير مشروط طبعا..

بعد تاخد القبول الغير مشروط ان شاءالله بتكون الاجراءات كالاتي :

انت كدا حجزت مقعد للسنه الدراسيه مثلا 2017 شهر 9  تمام.  في اجراءات صغيره بتعملها في السفاره الايطاليه هي :

* تسجيل ابتدائي عندهم وتوثيق شهاداتك عندهم .. ما هيوثقو ليك الا تكون موثق اولا ورقك من التعليم العالي والخارجية.. اوكي بتملا فورم اسمو فورم A بتلقاو في السفاره وبترفق شهاداتك الاصليه معاو عشان تتوثق وتدفع الرسوم .. بتاخد زي اسبوع او اتنين انت وحظك. بتصلو عليك تستلم شهاداتك موثق بالاضافه الي ورقه اسمها ( dichiarazione di valore) الورقه دي بتعني انو الزول دا نحنا وثقنا ليو ورقو واتاكدنا انو فعلا درس الحاجه الفلانيه في الجامعه الفلانيه والاختام صحيحه بتكون بالايطالي الورقه دي .

* بعد توثق ورقك بترسل للجامعه ايميل انو انا وثقت ورقي. مجرد اعلامهم لا اكثر. بس مهم انك توريهم لو
كسلان كلم المسئول الأكاديمي في السفاره يرسل ليهم طيب.

*ملحوظه بعض الجامعات بتطلب اجراء السفاره دا قبل القبول. اسأل الجامعه.

المنحه والتقديم عليها :~

* المنح ثلاث انواع :
1/ منحه الحكومه الايطاليه اعلانها بينزل في موقع السفاره الايطاليه.(ادخل موقع وزاره الخارجيه الايطاليه وتلقي التفاصيل)
2\منح من الجامعات نفسها للطلاب الاجانب غير الاوربين ودي تمسك فيها قوي شديد. شديد تاني
وهي نوعين :
انت وحظك فيها نوع يغطي كل شي من السكن والرسوم والمعيشه.
في نوع بغطي الرسوم بس.
3/المنح الولائيه.. كل ولايه في ايطاليا بتدي منح للطلاب الاجانب البجو يدرسو في الجامعات الفي الولاية ديك.. ودي منحه مضمونه جدا لكن مشكلتها بتفتح متاخر تقريباً بعد ما تصل ايطاليا.وعندها متطلبات موضحه في المنحه ذاتها . اسال الجامعه عنها.

المهم تقوم تشوف الانسب شنو وتقدم.. انصح دائما انك تقديم وتتعود تملا فورمات كتيره ما تزهج وتتجرس من اول صفحه.  الجامعات الايطاليه متساهله في حاجات كتيره. انت بس ابدأ وقول بسم الله.

شروط المنح الفوق ديل :~

طبعاً اهم شرط في المنح انو لازم تكون جهزت القبول اول. بعداك الشروط التانيه  90% منها زي شروط القبول..يعني تعيد ترسل الملفات تاني من الاول (شهادات.. خطابات توصيه.. شهادات خبره... الخ) شوفت الحنك ظريف كيف  بالاضافة لازم بطلبو منك تشرح ليه عاوز المنحه دي مالك ياربي عندك شنو وهنا تقعد تبكي وتوضحك المعاناه بتاعتك والطموح والخطه المستقبليه وانو الكورس دا هيفدني في الحاجه الفلانيه ...الخ.  زي personal statement القبيل ديك بس غير فيها شويه وقول المنحه دي هتفيدك في شنو.
وتبدا تقدم. وترسل الورق.

* عموما ارسال الاوراق دائما بكون :
1/تعمل اسكان وتعبي فورم المنحه وترسلهم بالايميل ودي الاسرع.
2/ اون لاين  تملا طلب المنحه  وترفع الورق في موقع الجامعه. الكلام دا علي حسب الجامعه هي دايره شنو.
3/بعض الجامعات بتطلب بالفاكس.

* نتيجه المنح غالبا من شهر 5 الي شهر 6 بتطلع النتائج. وكدا نقول مبروك ليك ان شاء الله.. بوضحو ليك في الايميل المنحه بتغطي شنو والتفاصيل.

* الاجراءات الباقيه روتينية مع السفاره عشان تقدم لفيزا الدراسيه ودي طول ما ورقك مكتمل الفيزا بدوك ليها ان شاء الله. ما في داعي نتكلم عنها هسع.

ملاحظات عامه :~

*اغلب المنح بتبدا من شهر اربعه عشان تجهز نفسك بدري

*الدراسه بتبدأ شهر 9 او 11 علي حسب الجامعه.

*من المهم تعرف كل موعد كويس جدا deadline بتاع القبول وبتاع المنح.

* الايميل بتاعك يكون مفتوح اربعه وعشرين ساعه اكرر تاني اربع وعشرين ساعه ما تقول لي ما عندي نت.. ويكون مربوط مع الموبايل ياريت عشان تعرف اي ابديت.. تكون في تواصل مستمر مع القسم بتاعك . الناس دي هناك ممتازين جدا وبردو عليك بسرعه في اي حاجه انت ما فهمتها عندهم ناس متخصصين كل شغلهم انهم حارسين الايميل والرد علي الرسائل بتاعتكم.

* الان اصبح شويه في ضغط علي السفاره الايطاليه عشان الفيزا وبقو يتشددو في المتطلبات.

* حديثاً السفاره الايطاليه بدت بتطلب ايلتس.. تقوم تقول ليهم اصلا الجامعه الايطاليه ادتني قبول وما طلبت ايلتس يكفي شهاده من الجامعه اني اكملت الدراسه بالانجليزي. او ترسل للجامعه الايطاليه تسال من اثبات انك معفي من الايلتس عشان توريو للسفاره.

* ركز علي الجامعات الغير مشهوره فرصتك فيها اكبر.

* نظام الدراسه بالانجليزي موجود وبالايطالي برضو موجود . 80% من الجامعات عندها نظام الدراسه بالانجليزي الكورسات التخصصية الاساسيه زي الهندسه والاداره والعلوم.
وكمان في جامعات الدراسه بس بالايطالي.

* كل المواقع الالكترونية للجامعات الايطاليه بالغتين الايطاليه والانجليزية.

*مافي زول  يغشك ويقول ليك لازم تتكلم ايطالي ولا لازم شهاده لغه ايطاليه دا حنك ساي البلد كلها ماشيه بالانجليزي والمجتمع في الجامعات مهني واحترافي جدا وطلبه من مختلف انحاء العالم معاك.

* الموضوع عاوز جهد وتعب وتبدأ خطوه خطوه لو حاسي نفسك ما هتقدر تلحق علي السنه دي ما مشكله ابدأ خطط للسنه البعديها 2018.  اصلو ما تيأس ✌ 

*بالنسبه للناس العاوزه تدرس بكالريوس نفس الورق والمتطلبات بتاعت الماستر الفرق بس بدل الشهاده الجامعيه لازم تكون شهاده ثانوي بالتفاصيل وموثقه وبتساهلو معاك في شهادات التوصيه والسي في.

*لو لاقدر الله ما قدرت تجيب المنحه.. وحبيت تدرس خاص ممكن الدراسه رخيصه مقارنه بدول الانجليز.. بطلبو منك كشف حساب بنكي وضمانات ماليه عند التقديم للفيزا في السفاره. ما تخاف مافي اي جامعه بتطلب منك انك ترسل الرسوم هسع كلو بعد ما تصل ايطاليا.

* الموضوع عاوز جهد وتعب وتبدأ خطوه خطوه الفرصه الاكبر انك تقدم كتير في اكتر من جامعه ماتقدم في واحده بس.

* هنزل عدد من الجامعات الايطاليه بعض منهم لانهم كتار شديد.  ادخل عليهم واتفسح في المواقع شويه.  طول بالك بس 

اعمل العليك والباقي علي ربك 

بالتوفيق ان شاء الله..

Mogdad abdeen

جامعه بولونيا
http://www.unibo.it/en/

جامعه تورينو

http://apply.polito.it/getting_started_en.html

جامعه ميلان
http://www.polimi.it/en/

جامعه بيزا

https://www.unipi.it/index.php/english

جامعه بارما
http://en.unipr.it/

جامعه اسبنزا روما
http://en.uniroma1.it/

المصدر: قروب Sudanese Researchers Initiative

الكاتب : Mogdad Abdeen